अखिल नेपाल फुटबल संघ (एन्फा) ले सोमबार गराएको कोरोना भाइरसको पिसिआर टेस्टमा सबै जनाको नेगेटिभ नतिजा आएको छ।
सोमबार ११ फुटबलरसहित २५ जनाको कोरोना टेस्ट गरिएको थियो।
मंगलबार गरिएको टेस्टको नतिजा आउन भने बाँकी छ। मंगलबार २३ जना फुटबलरहित २९ जनाको टेस्ट गरिएको थियो। जसको नतिजा बिहीबार प्राप्त हुनेछ।
सोमबार टेस्ट गराएका प्रशिक्षक किरण श्रेष्ठ, फिजियो अविष्कार पुडासैनीसहित खेलाडीहरू रञ्जित धिमाल, मिक्छेन तामाङ, विशाल राई, रविशंकर पासवान, दर्शन गुरुङ, विमल राना, दीप कार्की, दिलेन लोप्ताङ, छिरिङ गुरुङ, देवेन्द्र तामाङ र पुजन उमरकोटीको नतिजा नेगेटिभ आएको हो।
होस्टल स्टाफ मध्ये ६ जना किचेन स्टाफ, २ जना क्लिनर र ४ जना केयरटेकरको टेस्ट गरिएकोमा सबै जनामा कोरोना देखिएन।
एन्फाले भदौ १ देखि विश्वकप छनोटको तयारी सुरु गर्नुअघि फुटबल टिमका खेलाडी र अफिसियलको कोरोनाको परीक्षण गराएको हो। यद्यपी फिफाले यो वर्ष विश्वकप छनोट प्रतियोगिताका बाँकी खेल नगराउने जनाएको छ।
दोस्रो चरणको विश्वकप छनोटअन्तर्गत नेपालले अब तीन खेल खेल्न बाँकी छ। ती सबै खेल नेपालले घरेलु मैदानमा खेल्नेछ।
नेपालले चाइनिज ताइपेई, अस्ट्रेलिया र जोर्डनसँग खेल्नेछ। समूह बी मा रहेको नेपाल पाँच खेलमध्ये एउटामा जित निकाल्दै तीन अङ्क जोडेर चौथो स्थानमा छ। नेपालले चाइनिज ताइपेईलाई हराएको थियो। अन्य चार खेलमा नेपाल पराजित भएको थियो।