बलिउड अभिनेता राकेश बेदी यतिबेला काठमाडौंमा छन्। आइतबार काठमाडौं आएका उनले सोमबार बिहान पशुपतिनाथ मन्दिरको दर्शन गरेका छन्।
उनी नेपालमा प्रदर्शनरत आफ्नो नयाँ फिल्म 'है जवानी तो इश्क होना है' को प्रवद्र्धनसहित घुमघामका लागि काठमाडौं आएका हुन्।
राकेश पछिल्लो समय बलिउड फिल्म 'धुरन्धर' शृंखलामा 'जमील जमाली' पात्रमार्फत थप चर्चामा छन्।
उनी अभिनित पछिल्लो फिल्म 'है जवानी तो इश्क होना है' हाल नेपालका विभिन्न हलमा प्रदर्शन भइरहेको छ। सोही फिल्मको प्रवद्र्धनका लागि वितरण कम्पनी नियोम फिल्म्स र क्यापिटल वल्र्ड ग्रुपले उनलाई काठमाडौं ल्याएका हुन्।
काठमाडौं बसाइका क्रममा राकेशले सिनेमा हलको भ्रमण गर्दै दर्शकसँग प्रत्यक्ष भेटघाट पनि गर्ने जनाइएको छ। साथै, उनले नेपाली फिल्मकर्मीहरूसँग साक्षात्कार समेत गर्नेछन्।
राकेश सोमबार दिउँसो मण्डला थिएटरमा ‘मिट एन्ड ग्रिट’ कार्यक्रममा समेत सहभागी हुनेछन्, जसलाई अभिनेता विजय बरालले होस्ट गर्नेछन्। निओम फिल्मस् प्रा. लिले यो कार्यक्रम आयोजना गरेको हो। यहाँ नेपाली फिल्मकर्मीहरु समेत उपस्थित हुनेछन्।
भारतीय फिल्म तथा टेलिभिजन क्षेत्रका चर्चित कलाकार राकेशले दर्जनौं फिल्म तथा लोकप्रिय टेलिशृंखलामा अभिनय गरिसकेका छन्।
'धुरन्धर' शृंखलामा उनले निर्वाह गरेको 'जमील जमाली' पात्रले विशेष चर्चा बटुलेको थियो। फिल्ममा सुरूमा पाकिस्तानी राजनीतिज्ञका रूपमा प्रस्तुत हुने उनको पात्र क्लाइम्याक्समा महत्वपूर्ण मोडसँग जोडिएको छ, जसले दर्शकमाझ निकै चर्चा पाएको थियो।
बक्स अफिसमा ठूलो सफलता पाएको उक्त फिल्म नेपालमा पनि वर्षकै सर्वाधिक कमाइ गर्ने विदेशी फिल्ममध्ये एक बनेको छ।
