हलिउड निर्देशक क्रिस्टोफर नोलनको नयाँ फिल्म 'द ओडिसी' ले विश्वव्यापी बक्स अफिसमा ऐतिहासिक सुरूआत गरेको छ।
यसले प्रदर्शनको पहिलो सप्ताहन्तमै विश्वभरबाट २६४.१ मिलियन अमेरिकी डलर कमाएको हो। योसँगै फिल्मले नोलनको करिअरकै सबभन्दा ठूलो ओपनिङ रेकर्ड बनाएको छ।
निर्माण कम्पनी युनिभर्सल पिक्चर्सका अनुसार फिल्मले उत्तर अमेरिकाबाट मात्रै १२४.५ मिलियन डलर कमाएको छ।
अन्तर्राष्ट्रिय बजारबाट प्राप्त उत्कृष्ट कमाइका कारण 'द ओडिसी'ले नोलनका अघिल्ला चर्चित फिल्महरू 'ओपेनहाइमर' र 'द डार्क नाइट'लाई विश्वव्यापी ओपनिङमा पछि पारेको हो। यसअघि सन् २०१२ मा प्रदर्शनमा आएको 'द डार्क नाइट राइजेज' ले पहिलो सप्ताहन्तमा विश्वभरबाट करिब २४९ मिलियन डलर कमाएको थियो।
उत्तर अमेरिकी ओपनिङको हिसाबले भने 'द ओडिसी' नोलनका 'द डार्क नाइट राइजेज' र 'द डार्क नाइट'पछि तेस्रो स्थानमा छ। तर अन्तर्राष्ट्रिय कमाइ जोड्दा 'द ओडिसी' अहिले नोलनको सबभन्दा ठूलो विश्वव्यापी ओपनिङ गर्ने फिल्म बनेको हो।
नोलनका सबभन्दा धेरै कमाइ गर्ने फिल्म 'द डार्क नाइट' र 'द डार्क नाइट राइजेज'ले विश्वव्यापी रूपमा १ अर्ब डलरभन्दा बढी व्यापार गरेका थिए।
सकारात्मक 'वर्ड अफ माउथ' र दर्शकको उत्साहजनक प्रतिक्रियाका कारण 'द ओडिसी' पनि उक्त उपलब्धितर्फ उन्मुख हुने अनुमान गरिएको छ। नोलनको अघिल्लो फिल्म 'ओपेनहाइमर' ले सन् २०२३ मा विश्वव्यापी रूपमा ९१५ मिलियन डलर कमाएको थियो।
प्राचीन ग्रीक कवि होमरको प्रसिद्ध महाकाव्यमा आधारित 'द ओडिसी'मा अभिनेता म्याट डेमनले ग्रीक योद्धा ओडिसियसको भूमिका निर्वाह गरेका छन्। युद्धपछि घर फर्किने क्रममा उनले भोग्नुपर्ने जोखिमपूर्ण यात्राको कथा फिल्ममा प्रस्तुत गरिएको छ।
करिब २५० मिलियन डलरको लागतमा बनेको यस फिल्मले प्रदर्शनको पहिलो दिनदेखि नै दर्शकबाट उत्कृष्ट प्रतिक्रिया पाएको छ।
'द ओडिसी'मा म्याट डेमनसँगै एन ह्याथवे, टम हल्यान्ड, रोबर्ट प्याटिन्सनलगायत कलाकारहरूको अभिनय छ। विश्वव्यापी रूपमा शानदार व्यापार गरिरहेको यो फिल्म नेपालका सिनेमा हलहरूमा पनि प्रदर्शनरत छ।
नेपालमा शुक्रबार नै फिल्म रिलिज भएको थियो।
