चर्चित कथावाचक साइग्रेस पोखरेलले पुस्तक 'साइग्रेसः द स्टोरीटेलर' सार्वजनिक गरेका छन्।
आफ्नो कथावाचन यात्रा र यस क्षेत्रमा हासिल गरेका उपलब्धिहरूलाई समेटेर उनले यो पुस्तक ल्याएका हुन्।
उनको १०० औं लाइभ प्रस्तुतिसँगै संयुक्त राज्य अमेरिकाको कोलोराडोमा यो पुस्तक विमोचन गरिएको हो। विमोचन समारोहमा नेपाली सांगीतिक क्षेत्रका हस्ती एवं लेखक हिरण्य भोजपुरे, अमेरिकाका लागि नेपालका सद्भावना दूत विनोद अधिकारी, ग्लोबल नेपाल फिल्म अवार्ड अमेरिकाका अध्यक्ष नवराज श्रेष्ठ, संगीतकार मनोजराज सिवाकोटी र कोलोराडो कार्यक्रमका आयोजक सुमन केसीलगायत व्यक्तित्वहरूको उपस्थिति थियो।
'साइग्रेसः द स्टोरीटेलर' पुस्तकले कथावाचनको विश्वव्यापी इतिहासका साथै साइग्रेसका विश्वभरका प्रस्तुतिहरूका अविस्मरणीय क्षणहरूलाई प्रस्तुत गरेको छ। यसले उनको कथावाचनले दर्शकहरूमा पारेको गहिरो प्रभावको पनि विश्लेषण गरेको छ।
पुस्तकको एक प्रमुख आकर्षण उनको बहुचर्चित अडिओ उपन्यास ‘मेरो अधुरो प्रेम’ हो, जुन युट्युबमा हालसम्म ६६ लाख पटक हेरिएको छ।
पुस्तकमा साइग्रेसले आफ्नो कथावाचन यात्राका व्यक्तिगत अनुभव र आत्म निरीक्षणहरूलाई पनि समेटेका छन्। उनले विभिन्न दर्शकहरूसँगको अन्तरक्रियाका मर्मस्पर्शीसँगै अन्य थुप्रै कथाहरू बाँडेका छन्।
यो पनि: जहाँ गयो त्यहीँ फ्यानहरूले घेरेका साइग्रेस पोख्रेल को हुन्?
