डिजिटल रेमिटेन्स सेवा प्रदायक कम्पनी इसेवा मनी ट्रान्सफरले आफ्नो पाँच वर्ष वर्षे यात्रा सफलतापूर्वक पूरा गरेको छ।
कम्पनी एफवान सफ्ट ग्रुप अन्तर्गत २०७७ साल वैशाख ३० गते स्थापना भएर सञ्चालनमा आएको हो।
स्थापना कालदेखि नै डिजिटल रेमिटेन्सलाई प्राथमिकता दिँदै आएको कम्पनीले विश्वभर रहेका २०० भन्दा बढी देशहरूबाट नेपालीहरूले नेपालमा सजिलै पैसा पठाउने सक्ने सेवा उपलब्ध गराउँदै आएको छ।
पाँच वर्षको अवधिमा इसेवा मनी ट्रान्सफरले १०० भन्दा बढी अन्तर्राष्ट्रिय रेमिटेन्स कम्पनीहरूसँग सहकार्य गर्दै एक बलियो तथा विश्वासिलो अन्तर्राष्ट्रिय नेटवर्क निर्माण गर्न सफल भएको छ।
यस नेटवर्कमार्फत विदेशमा रहेका नेपालीहरूले आफ्ना प्रियजनको इसेवा वालेट, बैंक खाता वा नगद भुक्तानी केन्द्रहरूमा सजिलै, सुरक्षित र प्रभावकारी तरिकाले रकम पठाउन सहज बनाएको छ।
पाँचौं वार्षिकोत्सवको अवसरमा कम्पनीका प्रमुख कार्यकारी अधिकृत अजेश कोइरालाले भने, 'केबल पाँच वर्षको अवधिमै इसेवा मनी ट्रान्सफरले सुलभ, छिटो, सुरक्षित र परिस्कृत सेवा प्रदान गर्दै विदेशमा रहेका नेपालीहरूको मन जितेर उनीहरूको पहिलो रोजाइ बन्न सफल भएकोमा हामी अत्यन्त खुशी र उत्साहित छौं, डिजिटल नेपालको हाम्रो उद्देश्यमा विश्वास राख्दै साथ दिनुहुने सबै साझेदारहरू, प्रिय ग्राहकवर्ग तथा प्रत्यक्ष वा अप्रत्यक्ष रूपमा योगदान पुर्याउनु भएका सम्पूर्णमा हार्दिक आभार प्रकट गर्न चाहन्छौं।'
एफवान सफ्ट ग्रुपका अध्यक्ष सिद्धान्त ठकुरीले भने, 'इसेवा मनी ट्रान्सफरको पाँचौं वार्षिकोत्सव, नेपालमा वित्तीय सेवा क्षेत्रको रुपान्तरण गर्ने हाम्रो दूरदृष्टि तर्फको एक महत्वपूर्ण पाइला हो भन्ने अनुभूति गराउँछ। प्रविधिमा आधारित नवप्रवर्तन र ग्राहक केन्द्रित सेवाहरूको माध्यमबाट हामी संसारभर रहेका नेपालीहरूलाई अझ नजिक ल्याउँदै, वित्तीय समावेशिताको अनुभूति दिलाउने हाम्रो यात्रा अविच्छिन्न रूपमा अगाडि बढिरहेको छ।'
इसेवा मनी ट्रान्सफरले परम्परागत शैली र डिजिटल माध्यमबाट इसेवा वालेट, बैंक तथा वित्तीय संस्थाहरू र आफ्ना भुक्तानी केन्द्रहरू मार्फत पनि विप्रेषण सेवा प्रदान गर्दै आइरहेको छ।
-1746009348.jpg)
