निक्षेपको तुलनामा कर्जा लगानी नबढेपछि बैंकहरूले राष्ट्र बैंकमा राख्ने उब्रिएको रकम फेरि वृद्धि हुन थालेको छ।
राष्ट्र बैंकको तथ्यांक अनुसार अहिले बैंकहरूले यसरी राखेको रकम तीन खर्ब ४१ अर्ब रूपैयाँ पुगेको छ।
राष्ट्र बैंकले विभिन्न मौद्रिक उपकरणमार्फत् बैंकहरूमा उब्रिएको यस्तो रकम तान्ने गर्छ।
त्यस्तै, पुँजी कम हुँदा बैंकहरूको प्रणालीमा पैसाको प्रवाह बढाउने गर्छ।
निक्षेप संकलन र स्थायी निक्षेप सुविधा जस्ता वित्तीय उपकरण मार्फत् विभिन्न अवधिको लागि राष्ट्र बैंकले बैंकहरूबाट पैसा तान्ने गर्छ।
एक वर्षभन्दा लामो समयदेखि बैंकहरूमा पैसा थुप्रिएको छ। पैसा थुप्रिए पनि त्यही अनुसार बैंकहरूले कर्जा लगानी बढाउन नसक्दा राष्ट्र बैंकले उब्रिएको रकम तान्ने गर्छ।
कर्जा लगानी बढ्न नसक्दा अहिले बैंकिङ प्रणालीमा ६ खर्बभन्दा धेरै रकम (तरलता) रहेको छ।
केही समय अघि बैंकहरूले यसरी राष्ट्र बैंकमा राख्न थालेको रकम घट्दै दुई खर्ब ३३ अर्बमा सीमित हुन थालेको थियो।
सोभन्दा अघि यस्तो रकम चार खर्बसम्म पुगेको थियो।
तर, अहिले फेरि यस्तो रकम बढ्न थालेकोले बैंकहरूमा अहिले धेरै रकम भित्रिरहेको तर त्यही अनुसार कर्जा लगानी नभइरहेको संकेत गर्छ।
कर्जा लगानी जति कम भयो यसरी राखिने रकम बढ्दै जान्छ भने जति बढ्दै गयो, यसरी राखिने रकम त्यति नै कम हुँदै जान्छ।
बैंकहरूले आफूसँग भएको सबै रकम कर्जा लगानी गर्न पाउँदैनन्।
निक्षेप झिक्न आउने सर्वसाधारण लगायतलाई दिनुपर्ने भुक्तानी नरोकियोस् भनेर निक्षेप संकलन, चुक्ता पुँजी लगायत रकमको कम्तीमा २० प्रतिशत तरल सम्पत्तिको रूपमा राख्छन्।
जतिबेला चाहिन्छ त्यो बेला झिक्न सकियोस् भनेर बैंकहरूले यस्तो सम्पत्तिको रूपमा राखेका हुन्छन्।
यस्ता सम्पत्ति भनेको सरकारी ऋणपत्रहरू नै हुन्। केही रकम नै पनि बैंकहरूले राष्ट्र बैंकमा राख्छन्।
त्यस बाहेक राष्ट्र बैंकले बैंकमा बढी पैसा हुँदा तान्न र आवश्यक पर्दा पठाउने गरी विभिन्न वित्तीय उपकरण जारी गरिरहेको हुन्छ।
राष्ट्र बैंकको तथ्यांक अनुसार चैतसम्ममा भने बैंक तथा वित्तीय क्षेत्रबाट निजी क्षेत्रमा जाने कर्जा ७.१ प्रतिशतले बढेको छ।
गत वर्ष असारसम्ममा ५१ खर्ब ६७ अर्ब कर्जा लगानी गरेका बैंकहरूले चैतसम्ममा आइपुग्दा ५५ खर्ब ३४ अर्ब कर्जा लगानी गरेका हुन्।
गत महिना वैशाख ३० गतेसम्म बैंकहरूको निक्षेप ६८ खर्ब ६६ अर्ब र कर्जा लगानी ५५ खर्ब २४ अर्ब रूपैयाँ रहेको राष्ट्र बैंकको वेबसाइटमा उल्लेख छ।
-1746009348.jpg)
