राष्ट्रिय योजना आयोगका उपाध्यक्ष डा.गुणाकर भट्टले नेपाल धितोपत्र बोर्डको अध्यक्ष नियुक्तिका लागि गठन भएको सिफारिस समितिबाट राजीनामा दिएका छन्।
सरकारले उपाध्यक्ष भट्टको संयोजकत्वमा धितोपत्र बोर्ड अध्यक्ष सिफारिस समिति गठन गरेको थियो।
समितिमा अर्थसचिव घनश्याम उपाध्याय र विज्ञ सदस्यका रूपमा भुवनकुमार दाहाल रहेका थिए।
भट्टका दाइले सो पदको लागि आवेदन दिएपछि उनले नैतिकताको आधारमा राजीनामा दिएका हुन्।
नेपाल राष्ट्र बैंकका पूर्व कार्यकारी निर्देशक डा. गोपाल भट्टले पनि धितोपत्र बोर्ड अध्यक्षका लागि आवेदन दिएका छन्।
गोपाल भट्ट गुणाकर भट्टका दाइ पर्छन्।
बोर्डको अध्यक्ष पदका लागि कुल ४७ जनाले आफ्नो बायोडेटा बुझाएका छन्।
सिफारिस समितिले आवेदनमध्येबाट तीन जनाको नाम छनोट गरी सरकारसमक्ष सिफारिस गर्ने र तीमध्ये एक जनालाई धितोपत्र बोर्डको अध्यक्ष नियुक्त गर्ने व्यवस्था छ।
यसपटक भने समितिले आवेदनको रूपमाभन्दा पनि अहिलेलाई इच्छुक सबैबाट बायोडेटा मात्र माग गरिएको र कुनै पनि शुल्क नलिएको एक समिति सदस्यले बताए।
यो ४७ जनाको सूचीबाट पनि सिफारिस गर्न सकिने नाम उपलब्ध हुन नसके समिति आफैले सम्भावितहरूको खोजी गर्ने योजना रहेको उनले बताए।
भट्टले राजीनामा दिएसँगै नयाँ संयोजक नियुक्त पछि मात्रै अध्यक्ष छनोट प्रक्रिया अघि बढ्ने भएको छ।
स्रोतहरूका अनुसार सम्भवतः योजना आयोगकै अन्य सदस्यहरूबाट समिति संयोजक छानिने भएको छ।
