नेपाल राष्ट्र बैंकले अन्तर्राष्ट्रिय मुद्रा कोष (आइएमएफ)को सहयोगमा बाह्य लेखा परीक्षकबाट सम्पत्ति गुणस्तर परीक्षण भएका बैंकहरूको नाम सार्वजनिक गरेको छ।
यी बैंकहरूमा ग्लोबल आइएमई, नबिल, नेपाल इन्भेष्टमेन्ट मेगा, कुमारी,राष्ट्रिय वाणिज्य, लक्ष्मी सनराइज, हिमालयन, एनआइसी एसिया, एनएमबी र प्रभु बैंक छन्।
यी बैंकहरूको २०८१ चैतसम्मको वित्तीय विवरणको आधारमा सम्पत्ति गुणस्तर मूल्यांकन परीक्षण भएको थियो।
परीक्षणले यी बैंकहरूको औसत निष्क्रिय कर्जा अनुपात ७.६ प्रतिशत र औसत पुँजी पर्याप्तता अनुपात ११.३० प्रतिशत देखिएको राष्ट्र बैंकले उल्लेख गरेको छ।
बैंकहरूमा पुँजी पर्याप्तता अनुपात न्युनत्तम ८.५ प्रतिशत हुनैपर्ने व्यवस्था छ। त्यस्तै, निष्क्रिय कर्जा जति कम भयो त्यति राम्रो मानिन्छ।
बंगलादेशको हउलदार युनुस एन्ड को चार्टर्ड कम्पनीले यस्तो परीक्षण गर्ने गरि छनोट भएको थियो।
कम्पनीले प्रत्येक बैंकको छुट्टा छुट्टै र एकीकृत प्रतिवेदन दिएको पनि राष्ट्र बैंकले उल्लेख गरेको छ।
प्रतिवेदनले औंल्याएका सुधारका सुझावहरू कार्यान्वयन गर्दै लैजाने राष्ट्र बैंकले बताएको छ।
आइएमएफसँग सरकारले विस्तारित कर्जा सुविधा (इसिएफ) माग गरेसँगै यस्तो परीक्षण गर्नुपर्ने व्यवस्था गरिएको थियो।
आइएमएफबाट सरकारले ३८ महिनाका लागि प्राप्त हुने ३९ करोड ८८ लाख डलरको विस्तारित कर्जा सुविधा पाएको थियो।
