चालु आर्थिक वर्ष २०८३/८४ को पहिलो महिना साउनमा वैदेशिक लगानी प्रतिबद्धता उल्लेख्य रूपमा घटेको छ।
गत आर्थिक वर्षको साउनको तुलनामा यस वर्ष वैदेशिक लगानी प्रतिबद्धता करिब ८४ प्रतिशतले घटेको हो।
उद्योग विभागको तथ्यांक अनुसार आर्थिक वर्ष २०८२/८३ को साउनमा २४ अर्ब १० करोड ४९ लाख रूपैयाँ बराबरको वैदेशिक लगानी स्वीकृत भएको थियो।
चालु आर्थिक वर्षको साउनमा भने ३ अर्ब ७७ करोड २८ लाख रूपैयाँको मात्रै लगानी स्वीकृत भएको छ।
यो गत वर्षको तुलनामा २० अर्ब ३३ करोड २१ लाख ११ हजार रूपैयाँ कम हो।
गत वर्ष एउटै परियोजनामा २० अर्ब रूपैयाँको लगानी स्वीकृत भएको थियो।
लगानी प्रतिबद्धता घटे पनि स्वीकृत उद्योगको संख्या भने बढेको छ।
गत वर्षको साउनमा १२७ वटा उद्योग स्वीकृत भएकोमा यस वर्ष १९१ वटा पुगेका छन्।
चालु आर्थिक वर्षमा अटोमेटिक रुटबाट लगानी स्वीकृति लिने उद्योगको संख्या उल्लेख्य बढेको छ।
गत वर्ष ८१ वटा उद्योगले यो रुटबाट स्वीकृति लिएकोमा यस वर्ष १८७ पुगेका छन्।
तर, एप्रुभल रुटबाट स्वीकृति लिने उद्योगको संख्या भने ४६ बाट घटेर ४ वटामा सीमित भएको छ।
नयाँ लगानीबाट सिर्जना हुने प्रस्तावित रोजगारी पनि घटेको छ।
गत वर्षको साउनमा ८ हजार २६८ जनालाई रोजगारी दिने प्रस्ताव गरिएकोमा यस वर्ष १ हजार ७७३ जनाका लागि मात्रै रोजगारी प्रस्ताव गरिएको छ।
यस वर्ष स्वीकृत उद्योगमध्ये १८८ वटा साना उद्योग छन्।
गत वर्ष साना उद्योगको संख्या १२५ थियो। मझौला उद्योग दुईवटा स्वीकृत भएका छन्।
गत वर्ष मझौला उद्योग स्वीकृत भएका थिएनन्। ठूला उद्योगको संख्या भने दुईबाट घटेर एकमा आएको छ।
क्षेत्रगत रूपमा कृषि तथा वन क्षेत्रमा वैदेशिक लगानी प्रतिबद्धता सबैभन्दा ठूलो दरले घटेको छ।
गत वर्षको साउनमा यस क्षेत्रमा २० अर्ब ४ करोड ५५ लाख रूपैयाँ प्रतिबद्धता आएकोमा यस वर्ष २ करोड रूपैयाँमा सीमित भएको छ।
पर्यटन क्षेत्रमा पनि लगानी प्रतिबद्धता घटेको छ। गत वर्ष ३ अर्ब २ करोड रूपैयाँ रहेको प्रतिबद्धता यस वर्ष १ अर्ब ६३ करोड ७८ लाख रूपैयाँमा झरेको छ।
उत्पादनमूलक क्षेत्रमा भने लगानी प्रतिबद्धता बढेको छ।
गत वर्ष १५ करोड ५० लाख रूपैयाँ रहेको प्रतिबद्धता यस वर्ष ८४ करोड ३२ लाख रूपैयाँ पुगेको छ।
सेवा क्षेत्रमा पनि ३३ करोड ५० लाख रूपैयाँबाट बढेर ६८ करोड २० लाख रूपैयाँ पुगेको छ।
सूचना प्रविधि क्षेत्रमा पनि लगानी प्रतिबद्धता बढेको छ। गत वर्षको साउनमा ३६ करोड ५२ लाख रूपैयाँ प्रतिबद्धता आएकोमा यस वर्ष ५६ करोड ९८ लाख रूपैयाँ पुगेको छ।
विदेशी लगानीकर्ताका लागि बिजनेस भिसा सिफारिसको संख्या भने घटेको छ।
गत वर्ष १९४ वटा सिफारिस भएकोमा यस वर्ष ५० वटामा सीमित भएको छ।
यसैगरी, विदेशी लगानीबाट हुने लाभांश फिर्ता यस वर्षको साउनमा शून्य रहेको छ।
गत वर्षको सोही महिनामा २ अर्ब ९० करोड ७७ लाख ८९ हजार रूपैयाँ लाभांश बाहिरिएको थियो।
रोयल्टीबापत बाहिरिएको रकम भने बढेको छ।
गत वर्ष १८ करोड ४० लाख रूपैयाँ रहेको रोयल्टी यस वर्ष २४ करोड २१ लाख रूपैयाँ पुगेको छ।
यस वर्ष सेवा शुल्कबापत पनि १ करोड ७१ लाख रूपैयाँभन्दा बढी रकम बाहिरिएको छ।
