रसुवाको भोटेकोशी नदीमा आएको बाढीका कारण देशको कुल विद्युत उत्पादन क्षमताको करिब १० प्रतिशत प्रभावित भएको ऊर्जा, जलस्रोत तथा सिँचाइ मन्त्रालयले जनाएको छ।
बाढीबाट विद्युत उत्पादन, प्रसारण तथा वितरण संरचनामा ठूलो क्षति पुगेपछि विद्युत आपूर्तिमा हुन सक्ने असन्तुलनलाई ध्यानमा राख्दै नेपाल विद्युत प्राधिकरणले माग र आपूर्ति व्यवस्थापनलाई उच्च प्राथमिकतामा राखेर काम गरिरहेको ऊर्जा, जलस्रोत तथा सिँचाइ मन्त्री विराज भक्त श्रेष्ठले बताए।
मन्त्री श्रेष्ठका अनुसार हालसम्म विद्युत प्रणालीलाई सन्तुलित राख्न प्राधिकरण सफल भए पनि बाढीबाट भएको ठूलो क्षतिका कारण आगामी दिनमा थप चुनौती आउन सक्ने भएकाले आवश्यक तयारी र व्यवस्थापन तीव्र बनाइएको छ।
प्रारम्भिक विवरण अनुसार बाढीका कारण ४३१.१ मेगावाट क्षमताका १२ वटा विद्युत उत्पादन केन्द्र बन्द भई विद्युत प्रणालीबाट बाहिरिएका छन्।
त्यस्तै, निर्माणाधीन १५ वटा जलविद्युत आयोजनामा कुल ४७० मेगावाट क्षमतामा क्षति पुगेको प्रारम्भिक विवरण प्राप्त भएको मन्त्री श्रेष्ठले जानकारी दिए।
प्रसारणतर्फ त्रिशूली २२० केभी ३ बी हब सबस्टेसन पूर्ण रूपमा क्षतिग्रस्त भएको छ। विभिन्न १३२, ६६ तथा २२० केभी प्रसारण लाइन र टावरमा समेत क्षति पुगेको छ।
बाढीका कारण रसुवामा विद्युत आपूर्ति पूर्ण रूपमा अवरूद्ध भएको छ भने नुवाकोट, धादिङ र गोरखाका विभिन्न क्षेत्रमा आंशिक रूपमा विद्युत सेवा प्रभावित भएको छ।
विभिन्न विद्युत आयोजना तथा संरचनामा कार्यरत केही संख्यामा कर्मचारी तथा कामदार सम्पर्कविहीन छन्। उनीहरूको खोज तथा उद्धार कार्य जारी छ।
उद्धार तथा विद्युत सेवा पुनः स्थापनाका लागि नेपाल विद्युत प्राधिकरणका १५ वटाभन्दा बढी सवारी साधन प्रभावित क्षेत्रमा परिचालन गरिएको छ। थप उद्धार तथा प्राविधिक टोलीसमेत प्रभावित क्षेत्रमा खटाइएको मन्त्री श्रेष्ठले बताए।
वैकल्पिक व्यवस्थामार्फत विद्युत आपूर्ति पुनः सुरू गर्ने, क्षतिग्रस्त संरचनाको मर्मत तथा पुनः स्थापना गर्ने र सम्पर्कविहीन कर्मचारी तथा कामदारको खोजी तथा उद्धार गर्ने काम स्थानीय प्रशासन, सुरक्षा निकाय तथा सम्बन्धित निकायसँगको समन्वयमा भइरहेको मन्त्रालयले जनाएको छ।
अहिले मानवीय सुरक्षा, खोज तथा उद्धार र अत्यावश्यक विद्युत सेवा पुनः स्थापनालाई सरकारले उच्च प्राथमिकतामा राखेको मन्त्री श्रेष्ठले बताए। क्षतिको विस्तृत विवरण संकलन तथा प्राविधिक मूल्यांकनको काम समेत भइरहेको छ।
'अहिलेसम्म विद्युत प्रणालीलाई सन्तुलित राख्न सफल भएका छौं। तर, यति ठूलो दक्षतिका कारण आगामी दिनमा थप चुनौती आउन सक्ने भएकाले आवश्यक तयारी र व्यवस्थापनलाई उच्च प्राथमिकतामा राखिएको छ,' मन्त्री श्रेष्ठले भने।
