भोटेकोशी–त्रिशूली बाढीले माथिल्लो त्रिशूली–१ जलविद्युत आयोजनामा सम्पर्कविहीन रहेका व्यक्तिहरूको खोजीमा सघाउन ४४ सदस्यीय कोरियाली उद्धार टोली बुधबार बिहान नेपाल आइपुगेको छ।
२१६ मेगावाटको माथिल्लो त्रिशूली–१ सबभन्दा बढी मान्छे हराइरहेको जलविद्युत आयोजना हो। स्वतन्त्र ऊर्जा उत्पादकहरूको संस्था इप्पान नेपालले दिएको विवरण अनुसार यहाँ ५७६ जना सम्पर्कविहीन छन् भने ३०० जना सुरूङमा फसेको अनुमान छ।
सम्पर्कविहीनमा ९ कोरियाली समेत छन्। तीमध्ये ६ जना दुसान इनर्जिबिलिटी कम्पनीका र ३ जना कोरिया साउथ–इस्ट पावर कम्पनीका कर्मचारी हुन्।
दक्षिण कोरियाको विदेश मन्त्रालय, कोरिया इन्टरनेसनल कोअपरेसन एजेन्सी (कोइका) र अग्नि नियन्त्रण निकायका अधिकारीसहित ४४ सदस्यीय कोरिया डिजास्टर रेस्पोन्स टिम बुधबार बिहान नेपाल अवतरण गरेको कोरियन टाइम्सले जनाएको छ।
टोली दक्षिण कोरियाली वायुसेनाको केसी–३३० सिग्नस बहुउद्देश्यीय ट्यांकर तथा सैनिक यातायात विमानमार्फत काठमाडौं आइपुगेको हो।
विदेश मन्त्रालयका एक अधिकारीलाई उद्धृत गर्दै कोरियन टाइम्सले लेखेको छ, 'टोलीले नेपाली अधिकारी र नेपालमा खटिएको हाम्रो सरकारी आपतकालीन प्रतिक्रिया टोलीसँग सहकार्य गरेर खोज तथा उद्धार अभियान सञ्चालन गर्नेछ।'
उनका अनुसार टोलीको नेपाल बसाइँ करिब १० दिनका लागि तय गरिएको छ। तर घटनास्थलको अवस्था हेरेर उक्त अवधि थप हुन सक्नेछ।
कोरिया डिजास्टर रेस्पोन्स टिमले पाँचवटा उद्धार कुकुरसहित उच्च क्षमताका ड्रोन, ध्वनि र भिडिओका माध्यमबाट भग्नावशेषमा पुरिएका मानिसको अवस्था पत्ता लगाउने उपकरण तथा थर्मल इमेजिङ डिटेक्टर लगायत आधुनिक उद्धार सामग्री नेपाल ल्याएको छ।
बेपत्ताको खोजीका लागि आपतकालीन प्रतिक्रिया टोलीले सम्बन्धित कम्पनीका टोलीसँगको सहकार्यमा हेलिकप्टर, ड्रोन, उद्धार कुकुरलगायत उपलब्ध सबै माध्यम परिचालन गर्दै आएको छ।
तर खोजी क्षेत्र ठूलो हुनुका साथै विकट भूगोल, बाढीले थुपारेको माटो र भग्नावशेषका कारण उद्धार तथा खोजी कार्यमा कठिनाइ भइरहेको जनाइएको छ।
उद्धारकर्मीहरू बाढीबाट सबभन्दा बढी प्रभावित क्षेत्रमध्ये एक रसुवाको धुन्चे पुगेको पनि कोरियन टाइम्सले लेखेको छ। उनीहरूले प्रभावित क्षेत्रमा खोजी गरिरहेका छन्। धुन्चे माथिल्लो त्रिशूली–१ जलविद्युत आयोजनाको माथिल्लो बाँधबाट करिब दुई किलोमिटर टाढा पर्छ।
दक्षिण कोरियाली विदेश मन्त्रालयका अर्का अधिकारीले कोरियन टाइम्सलाई भनेका छन्, 'प्रतिक्रिया टोली धुन्चेमै रहनेछ र आज नेपाली सेनासँग मिलेर हेलिकप्टर, ड्रोन तथा स्थलमार्गबाट संयुक्त खोजी अभियानलाई निरन्तरता दिनेछ।'
उनका अनुसार बेपत्ता व्यक्तिहरूको मोबाइल फोनको लोकेसन ट्र्याक गर्न सकिने सम्भावनाबारे पनि नेपाली अधिकारीहरूसँग छलफल भइरहेको छ।
बेपत्ता व्यक्तिहरू रहेको हुनसक्ने स्थानबारे जानकारी संकलन गर्न नेपाली सेनासहित स्थानीय अधिकारी र बाँचेकाहरूसँग समेत कुराकानी भइरहेको उनले बताए।
दुसान इनर्जिबिलिटीले पनि उच्च क्षमताका ड्रोन प्रयोग गर्दै हेलिकप्टरबाट खोजी गरिरहेको छ। कम्पनीले हवाई खोजी क्रममा खिचिएका भिडिओ फुटेजको विस्तृत विश्लेषण गर्ने तयारी गरेको छ।
कोरिया साउथ–इस्ट पावरले पनि ड्रोन र खोज तथा उद्धार कुकुर प्रयोग गरिरहेको छ। घटनास्थलमा जारी उद्धार अभियानमा सहयोग गर्न थप जनशक्ति पठाउने विषयमा पनि कम्पनीले विचार गरिरहेको अधिकारीहरूले बताएका छन्।
आफ्ना नागरिकसमेत हराइरहेको माथिल्लो त्रिशूली–१ मा कोरियाले पहिलेदेखि नै उद्धारमा खटिने चासो देखाएको थियो। तर नेपालले अनुमति नदिँदा भारतीय र चिनियाँ बाहेक अन्य मुलुकका प्राविधिकहरू उद्धारमा संलग्न हुन पाएका थिएनन्।
