अस्ट्रेलिया पठाइदिन्छु भन्दै ३० लाख रूपैयाँ ठगी गर्ने एक जना युवकलाई प्रहरीले पक्राउ गरेको छ।
काठमाडौं उपत्यका अपराध अनुसन्धान कार्यालयले वैदेशिक रोजगारीका लागि अस्ट्रेलिया पठाइदिन्छु भन्दै ठगी गरेको आरोपमा चितवन भरतपुर महानगरपालिका घर भई काठमाडौं, लाजिम्पाट बस्ने २७ वर्षीय सन्जय रेग्मीलाई आइतबार पक्राउ गरेको हो।
पक्राउ परेका रेग्मी लाजिम्पाटस्थित माझी विष्ट्रो रेस्टुरेन्टका सञ्चालक समेत हुन्।
कार्यालयका प्रहरी उपरीक्षक रवीन्द्र रेग्मीका अनुसार अस्ट्रेलियामा मासिक तीन लाखभन्दा बढी तलब हुने प्रलोभन देखाएर तीस लाखभन्दा बढी रकम ठगी गरेको आरोपमा सन्जयलाई पक्राउ गरिएको जानकारी दिए।
सन्जयलाईलाई वैदेशिक रोजगार विभागबाट गरिएको पत्राचारको आधारमा दरबारमार्गबाट पक्राउ गरिएको प्रहरीले जनाएको छ। आवश्यक अनुसन्धान तथा कारबाहीका लागि उनलाई वैदेशिक रोजगार विभाग बुद्धनगर पठाइएको प्रहरी उपरीक्षक रवीन्द्र रेग्मीले बताए।
