सुडानमा हालै विकसित परिस्थितिमा त्यहाँ रहेका नेपाली नागरिकको सकुशल उद्धार तथा घर फिर्तीका लागि कायरोस्थित नेपाली राजदूतावासको सम्पर्कमा रहेका १३ जना नेपाल आइपुगेका छन्।
दूतावासको सम्पर्कमा रहेका ३१ जनामध्ये साउदी अरेबिया सरकारको सहयोगमा १९ जनालाई जेद्दा पुर्याइएको थियो। उनीहरूमध्ये १३ जना बिहीबार नेपाल आइपुगेको परराष्ट्र मन्त्रालयले जनाएको छ।
६ जना रोजगारदाता कम्पनीको संयुक्त अरब इमिरेट्सको दुबइस्थित शाखामा स्थानान्तरण भएका छन्।
चिनियाँ कम्पनीमा कार्यरत एक जना नेपाली नागरिकको भने चीन सरकारको सहयोगमा यसअघि नै उद्धार भइसकेको छ।
अरू १२ जनामध्ये नौ जना नेपाली नागरिक भारत सरकारको सहयोगमा बिहीबार पोर्ट सुडानबाट हवाईमार्ग हुँदै भारतको अहमदावादका लागि प्रस्थान गरेको मन्त्रालयले जारी गरेको विज्ञप्तिमा उल्लेख छ।
स्वेच्छाले सुडानमै रहेका तीन जनामध्ये रोजगारदाता कम्पनीको प्रबन्धमा एक जना पोर्ट सुडानमा र दुई जना सुडान–इजिप्टको सिमानानजिक सुरक्षित छन्। तीनै जना नेपाली नागरिक कायरोस्थित नेपाली राजदूतावासको सम्पर्कमा छन्।
संयुक्त राष्ट्रसंघीय शान्ति मिसनमा कार्यरत नेपाली अधिकारीहरूको यसअघि नै सुरक्षित स्थानमा उद्धार भइसकेको छ। सुडानमा अलपत्र परेका नेपाली नागरिकको उद्धार कार्यमा परराष्ट्र मन्त्रालय तथा कायरो, रियाद र जेद्दास्थित नेपाली नियोगहरूबाट सक्रिय रूपमा समन्वय र सहजीकरण भएको छ।
उद्धार प्रक्रियामा सहयोग पुर्याउने भारत, चीन र साउदी अरेबिया सरकारप्रति नेपाल सरकारले धन्यवाद प्रकट गरेको छ।
