बेलायत पठाउने भन्दै ११ करोडभन्दा बढी रकम ठगेको आरोपमा पक्राउ परेका व्यक्ति कन्सल्टेन्सीमा शिक्षक रहेको खुलेको छ।
केही दिनअघि काठमाडौं उपत्यका अपराध अनुसन्धान कार्यालयको टोलीले ठगी आरोपमा दुई जनालाई पक्राउ गरेको थियो।
मोरङ घर भई काठमाडौंको सरस्वती नगर बस्ने ४४ वर्षीय लक्ष्मण पराजुली र धनुषा घर भई नरेफाँट बस्ने ४७ वर्षीय अरूणराज शर्मालाई प्रहरीले आइतबार पक्राउ गरेको हो।
वैदेशिक रोजगार विभाग ताहाचलमा उनीहरूविरूद्ध जाहेरी आइरहेको थियो। ३८ जनाले आफूहरू लक्ष्मण पराजुलीबाट ठगिएको भन्दै विभागमा पुगे।
विभागले पक्राउ गर्नका लागि भनेर कार्यालयलाई पत्राचार गरेको थियो।
त्यसपछि कार्यालयको टोलीले पराजुलीलाई तीनकुनेबाट र शर्मालाई नरेफाँटबाट पक्राउ गरेको एसपी काजीकुमार आचार्यले जानकारी दिए।
सुरूमा ३८ जना पीडित मात्रै प्रहरीको सम्पर्कमा पुगेका थिए। अहिले उक्त संख्या ४१ पुगेको छ।
बेलायतमा पठाएर वर्किङ भिसा र पर्मानेन्ट भिसाको प्रलोभनमा पारेर ठूलो रकम असुल गरेको प्रहरीको भनाइ छ।
एक अनुसन्धान अधिकारीका अनुसार उनीहरूले प्रतिव्यक्ति ४० लाखको दरले रकम उठाएको हो।
‘पीडितहरूसँग प्रत्यक्ष रूपमा संलग्न हुने व्यक्ति लक्ष्मण हुन्। उनले नै रकम असुल गरेको भन्दै पीडितहरूले पक्राउ गरिदिन भनेर उजुर गरेका थिए,’ ती अधिकारीले भने।
प्रहरीको प्रारम्भिक अनुसन्धानबाट उनी अंग्रेजी भाषाको परीक्षाका लागि तयारी कक्षा सञ्चालन गर्ने शिक्षक रहेको खुलेको हो।
एक प्रहरीका अनुसार उनले विगत पाँच वर्षदेखि पुतलीसडक र चाबहिलमा इएलटी सेन्टर सञ्चालन गरेका थिए।
‘त्यहाँ आइइएलटिएस तयारी कक्षा सञ्चालन गर्ने शिक्षक रहेछन्,’ ती प्रहरीले भने, ‘उनले पनि ११ करोड रकम अरूलाई नै बुझाएको भन्छन्। तर यकिन खुलेको छैन।’
उनले पनि करिअर टेक कन्स्ल्टेन्सीलाई बुझाएको प्रहरीलाई बताएका छन्। यद्यपि उक्त कम्पनीको विवरण भने खुलेको छैन।
प्रहरीका अनुसार ठगी मुद्दामै उनकी श्रीमती पनि फरार छिन्।
प्रहरीले पक्राउ गरेका अर्का अरूणराज शर्मा उनका पार्टनर हुन्। उनी इन्स्टिच्युट फर मेडिकल स्टडिज एन्ड ग्लोबल एडुकेसन प्रालिका सञ्चालक हुन्।
उनको पनि संलग्नतामा उक्त रकम लिएर ठगेको प्रहरीको भनाइ छ।
यसबारे थप अनुसन्धानका लागि प्रहरीले वैदेशिक रोजगार विभागमै पठाएको छ।
