टिकटकर रमा बस्नेत पक्राउ परेकी छन्।
खोटाङको हलेसीतुवाचुङ नगरपालिका-६ घर भई भक्तपुर बस्ने ३१ वर्षीय रमा बस्नेतलाई आइतबार नेपाल प्रहरीको साइबर ब्युरोले पक्राउ गरेको हो।
ब्युरोले आइतबार ‘टिकटकमार्फत नियोजित रूपमा जातीय साम्प्रदायिक भावनामा खलल पुर्याउनुका साथै प्रतिष्ठित व्यक्ति तथा संस्था र सम्प्रदायप्रति नकारात्मक धारणा फैलाएर चरित्र हत्या गरेको विषयमा व्यक्ति पहिचानका लागि आवश्यक प्राविधिक विश्लेषण र अनुसन्धान गरी पक्राउ’ गरेको भनेर प्रेस विज्ञप्ति जारी गरेको छ।
ब्युरोका प्रवक्ता एवम् एसपी दीपकराज अवस्थीले कसको प्रतिष्ठामा आँच पुर्याउने गरी धारणा व्यक्त गरेका थिए भन्ने खुलाएका छैनन्। उनले उजुरीकर्ताको परिचय गोप्य नै राखिने बताए।
बस्नेतमाथि विद्युतीय कारोबार ऐन, २०६३ अन्तर्गत काठमाडौं जिल्ला अदालतबाट तीन दिन म्याद थप गरी अनुसन्धान सुरू भएको छ।
स्रोतका अनुसार उनीविरूद्ध एउटा मन्त्रालयले नै उजुरी गरेको छ।
'एउटा मन्त्रालयको लेटरप्याडमै उजुरी आएको थियो,' स्रोतले सेतोपाटीसँग भन्यो।
त्यसबाहेक अन्य जाहेरी पनि रहेको र अझै आउने क्रममै रहेको उक्त स्रोतले जानकारी दिएको।
बस्नेतले नेपाली सेनाको पोसाक लगाएर टिकटक बनाएको पनि आरोप ब्युरोको छ।
यद्यपि नेपाली सेनाले उनलाई पक्राउ गर्न भनेर पत्राचार भने गरेको छैन।
नेपाली सेनाले गैर सैनिकले पोशाक लगाएर टिकटक बनाएको भन्ने पत्ता लगाएको थियो।
बस्नेतले पोशाक लगाएर टिकटक बनाएको थाहा पाएपछि उक्त टिकटक हटाउनका लागि मात्रै पत्राचार भएको नेपाली सेनाका प्रवक्ता एवं सहायक रथी राजाराम बस्नेतले जानकारी दिए।
‘हाम्रो साइबर सुरक्षा हेर्ने निकायले उहाँले पोशाक लगाएर भिडिओ बनाएको थाहा पाएर नेपाल प्रहरीको ब्युरोलाई हटाउनका लागि पत्राचार भएको हो,’ उनले भने।
