हामी सुकुम्बासी परिवारलाई राखिएको नागार्जुन नगरपालिका-२ को इचंगु अपार्टमेन्ट जाँदा तलमाथि डुल्दै थिए — भूमिका र मुकेश दाहाल।
१३ वर्षीया भूमिका र १२ वर्षीय मुकेश दिदीभाइ हुन्। उनका बुबा विक्रम र आमा सुनिता भने कोठामा भेटिएनन्।
उनीहरूको कोठा नम्बर हो — ३०१।
यी दिदीभाइ अपार्टमेन्टमा दुई-चार जना मान्छे भेला भएको देख्नेबित्तिकै नजिक उभिएर एकनासले कुरा सुन्थे। अनि आफूलाई चित्त नबुझेको कुरा फ्याट्ट बोलिहाल्थे।
'यहाँ त केही राम्रो छैन। तरकारी पनि मिठो बनाउँदैनन्,' मुकेशले भने, 'तरकारीमा नुन लागेकै हुँदैन। आलु पनि नताछी पकाउँछन्।'
सुकुम्बासी बस्तीबाट हटाएर विभिन्न लजमा राखिएका १०० जनाभन्दा बढी सुकुम्बासीलाई गत शुक्रबार इचंगु अपार्टमेन्ट ल्याइएको थियो। भूमिका र मुकेश तिनैमध्ये हुन्।
यी दिदीभाइको जन्म मध्यपुर थिमि नगरपालिका-१ मा पर्ने मनोहरा खोला किनाराको सुकुम्बासी बस्तीमा भएको हो। उनीहरूलाई आफ्नो खास घर कहाँ हो भन्ने कुनै जानकारी छैन।
बस्तीमा छँदा उनीहरू त्रि-स्टार अंग्रेजी माध्यमिक विद्यालयमा पढ्थे। यसपालि भूमिका कक्षा ७ र मुकेश कक्षा ५ जानुपर्ने थियो। तर वैशाख १३ गते मनोहराको सुकुम्बासी बस्तीमा डोजर चलेर बेघर भएदेखि उनीहरू स्कुल जान पाएका छैनन्।
'यहाँ ल्याएपछि केही राम्रो लागेको छैन। साथीहरू पनि कोही छैनन्,' दिदीभाइले एकै स्वरमा भने, 'यहाँ बसिरहन अल्छी लाग्छ, स्कुल जान पाए हुन्थ्यो।'
मुकेशको लोकन्थलीमा डेरा बस्ने एक जना मिल्ने साथी थिए। स्कुल आउँदा-जाँदा सँगै हिँड्थे। अहिले तिनै साथीको खुब याद आइरहने उनी बताउँछन्।
भूमिका र मुकेशका आमाबुबा उनीहरूको भविष्यलाई लिएर चिन्तित छन्। बासको ठेगान नभएकाले उनीहरूलाई कहाँ पढाउने भन्ने टुंगो नभएको उनीहरू बताउँछन्।
'सरकारले कहाँ लगेर राख्ने हो भन्ने नै पक्का छैन। आमाबुबाले बस्ने ठाउँ टुंगो लागेपछि स्कुल पठाउँछौं भन्नुभएको छ,' भूमिकाले भनिन्, 'सरकारले पनि हामी आफै पढाइदिन्छौं भनेको छ रे, त्यही पर्खिरहेका छौं।'
स्कुल जान नपाएको गुनासोका अतिरिक्त उनीहरूले यहाँको खाना पनि नमिठो भएको सुनाए।
अहिले बस्ने अपार्टमेन्टसँगै रहेको मानव सेवा आश्रममा उनीहरूको खानाको व्यवस्था गरिएको छ। बिहान ९ र साँझ ७ बजे खाना खान जान्छन्। त्यहाँ सुकुम्बासीहरूका लागि मात्र होइन्, पहिलेदेखि नै मानव सेवा आश्रममा रहेकाहरूलाई पनि सँगै खाना खुवाइन्छ।
लगभग तीन सय जनालाई आश्रमले खाना खुवाइरहेको छ। त्यहाँको खाना आफूलाई मन नपरेको मुकेश बताउँछन्।
'यहाँ खाना मात्र होइन। केही पनि राम्रो छैन,' उनले भने, 'हामीलाई दिइएको कोठा पनि एकदमै फोहोर थियो। पछि हामीले नै अलिअलि सफा गर्यौं।'
उनीहरूलाई दिइएको कोठामा दुईवटा बेड राखिएका छन्। एउटामा दिदीभाइ र अर्कोमा आमाबुबा सुत्छन्।
'हाम्रो कोठा हेर्नुहुन्छ?' कोठाको साँचो हातैमा बोकेकी भूमिकाले भनिन्।
उनीहरूले कोठामा आफ्ना जुत्ता र केही लुगा मिलाएर राखेका थिए। अरू सामान खासै थिएनन्।
आफ्नो कोठा देखाउँदै मुकेशले भने, 'यत्ति ठाउँ हो। ओढ्ने पनि छैन, ओछ्याउने पनि छैन। हामीलाई यो ठाउँ मन परेन भनेर बालेन सरकारलाई भन्दिनू है!'
यो पनि पढ्नुहोस्:
