रसुवाको भोटेकोशी नदीमा बाढीको बहाब बढेको छ।
राष्ट्रिय विपद जोखिम न्यूनीकरण तथा व्यवस्थापन प्राधिकरणका अनुसार बिहान ७:२० बजे भोटेकोशीमा बाढीको बहाब बढेको हो
प्राधिकरणले बाढीको बहाब बढेका कारण रसुवा, नुवाकोट, धादिङ, चितवन लगायत प्रभावित क्षेत्रको नदी तटीय क्षेत्रमा खोजी कार्यमा सतर्कता अपनाउन आग्रह गरेको छ।
'रसुवाको भोटेकोशी नदीमा बाढीको बहाव थप केही बढेको सूचना प्राप्त भएकोले रसुवा, नुवाकोट, धादिंङ, चितवनलगायतका प्रभावित क्षेत्रमा खोज, उद्धार तथा राहतमा खटिएका, तटीय क्षेत्रमा रहेका एवं अन्य सम्बन्धित सबैमा सतर्कता अपनाउनु हुन अनुरोध छ। थप सूचना प्राप्त हुनसाथ अद्याधिक गर्नेछौं,' प्राधिकरणले भनेको छ।
यसअघि बाढी पूर्वानुमान महाशाखाले बाढी आए पनि ठूलो जोखिम नरहेको बताएको थियो।
महाशाखाले आइतबार बिहान पौने ६ बजे सूचना जारी गरी रसुवादेखि नुवाकोटसम्म त्रिशूलीको बहाब केही बढेको भए पनि ठूलो जोखिम नरहेको स्पष्ट पारेको हो।
'जिल्ला प्रहरी कार्यालय रसुवाका अनुसार भोटेकोशी नदीमा बाढीको बहाव बढेको प्राप्त सूचना अनुसार हाल नुवाकोटमा बाढी केही बढेको तर ठूलो नरहेको हुँदा यसै सूचनालाई आधारमानी हाललाई रसुवा, नुवाकोट, धादिङसम्म नदी आसपासको क्षेत्रमा ठूलो बाढीको जोखिम नरहेको जानकारी गराउँदछौं,' महाशाखाले भनेको थियो।
यसअघि महाशाखाे नै भोटेकोशीमा बाढीको आवाज आएको र तटीय क्षेत्रमा सतर्क रहन भनेर अपिल पनि गरेको थियो।
रसुवाका सहायक प्रमुख जिल्ला अधिकारी द्रुवप्रसाद अधिकारीले पनि बाढीको आवाज आएको तर अँध्यारोका कारण बाढी कति ठूलो हो भन्ने यकिन गर्न नसकिएको बताएका थिए।
'आवाज ठूलो छ। अँध्यारै भएकाले हेर्न सकिने अवस्था छैन। धादिङ र नुवाकोट, मन्त्रालय र विपद जोखिम न्युनिकरण तथा व्यवस्थापन प्राधिकरणसम्म खबर गरेको छु,' उनले सेतोपाटीसँग बिहानीपख भनेका थिए, ' एक घण्टादेखि निरन्तर आवाज छ। अस्ति छोटो समयमा घटेको भए पनि आज निरन्तर आवाज आइरहेको छ।'
त्रिशुलीस्थित उद्धार तथा राहतमा खटिएका हाम्रो टिम नेपालका बिमल पन्तले पनि बाढी आएकाले आफूहरू माथिल्लो भेगमा आएको बताए।
'हामी उद्धारका लागि त्रिशूली पारी आएका थियौं। ठूलो बाढी आएकाले भागाभाग अवस्था छ। अस्तीको भन्दा ठूलो आयो भनेका छन्। हामी अहिले डाँडामा आएर बसेका छौं। धेरै मानिसहरू भागाभाग छन्,' उनले सेतोपाटीसँग भनेका थिए।
त्यसैगरी, रसुवा प्रशासनबाट बाढीको सूचना प्राप्त गरेपछि चितवन र काठमाडौंको नागढुंगामै गाडी रोकिएका छन्।
बागमती प्रदेश ट्राफिक प्रहरी प्रमुख एसपी डिल्लीनारायण पाण्डेका अनुसार बिहान साढे ४ बजेदेखि गाडी रोकिएका हुन्।
'रसुवाबाट बाढी आएको सूचना छ। साढे ४ बजेदेखि चितवन र नागढुंगामा गाडी रोकिएका छन्। तल्लो तटीय क्षेत्रमा हाइ अलर्टमा रहन आग्रह गरिएको छ,' उनले भने।
बाढीको ठूलो जोखिम नरहेको सूचना प्रवाह भएपछि रोकिएका गाडीहरू पनि चल्न थालेका थिए।
