भारतीय अभिनेत्री सोनाक्षी सिन्हा र ज्योतिका अभिनीत कोर्टरूम ड्रामा फिल्म 'सिस्टम'को ट्रेलर सार्वजनिक भएको छ।
मंगलबार दिउँसो सार्वजनिक करिब २ मिनेटको ट्रेलरमा बाबु-छोरीबीचको कानुनी संघर्ष देखाइएको छ। सोनाक्षी सिन्हा 'नेहा' नामकी महत्वाकांक्षी वकिलको भूमिकामा छिन्।
आफ्नो बाबु (आशुतोष गोवारिकर) को कानुनी फर्ममा साझेदार बन्न योग्य सावित गर्न उनले १० वटा मुद्दा जित्ने चुनौतीको सामना गर्छिन्। त्यसका लागि उनी अदालतकी स्टेनोग्राफर सारिका (ज्योतिका) सँग सहकार्य गर्छिन्। तर सारिकाको आफ्नै गोप्य उद्देश्य रहेको संकेत ट्रेलरमा देखाइएको छ।
ट्रेलरमा न्याय प्रणालीभित्रको शक्ति संघर्ष र सामाजिक असमानताको विषयलाई उठाइएको छ।
अश्विनी अय्यर तिवारीद्वारा निर्देशित 'सिस्टम' सिधै ओटिटी प्लेटफर्मममा रिलिज हुने तयारी छ। प्राइम भिडिओ इण्डियाले प्रस्तुत गरेको फिल्म मे २२ देखि प्राइम भिडिओमा स्ट्रिम हुनेछ।
