सेयर बजारमा सूचीकृत २० वटा वाणिज्य बैंकमा अधिकांशको सेयर मूल्य दुई सय रूपैयाँभन्दा कममा कारोबार भइरहेको छ।
तर, चार वटा बैंकको मूल्य भने पाँच सय माथि छ। यसरी पाँच सय रूपैयाँभन्दा माथि रहेको एभरेष्ट बैंकमा पनि पछिल्लो समय लगानीकर्ताको आकर्षण बढिरहेको छ।
यस सातापछि रकमका आधारमा उच्च कारोबार हुने प्रमुख चारमा एभरेष्ट बैंक पनि पर्न सफल भएको छ।
सातामा बजारमा चार अर्ब रूपैयाँको कारोबार हुँदा एभरेष्ट बैंकको मात्रै ११ करोड ५० लाख रूपैयाँको कारोबार भएको छ।
यो कुल कारोबार रकमको २.८३ प्रतिशत हो।
लगातार चार दिनदेखि मूल्य बढेर बैंकको सेयर कारोबार भएको छ। यी चार दिनमा कम्पनीको मूल्य ३.६५ प्रतिशतले बढेको हो।
आइतबार पाँच सय २० रूपैयाँमा किनबेच भइरहेको बैंकको सेयर पाँच सय ३९ रूपैयाँमा पुगेको छ।
बैंकमा लगानीकर्ताहरूको आकर्षण बढ्नुमा बैंकले हालै प्रकाशित गरेको वित्तीय विवरण पनि एक हो।
चालु आर्थिक वर्ष २०७९÷८० को तेस्रो त्रैमासमा अधिकांश बैंकहरूको नाफामा संकुचन आइरहँदा एभरेष्ट बैंकको नाफा भने करिब ६३ प्रतिशतले वृद्धि भएको छ।
यो अवधिमा बैंकहरूको औसत नाफा मात्रै ११ प्रतिशत छ।
एभरेष्ट बैंकको नाफा एक अर्ब ५१ करोड रूपैयाँबाट बढेर २ अर्ब ४६ करोड रूपैयाँ पुगेको हो।
बैंकले दिनसक्ने लाभांश पनि अन्य अधिकांश बैंकहरूको तुलनामा उच्च नै छ। बैंकले प्रकाशित गरेको वित्तीय विवरण अनुसार वितरण योग्य नाफा सबैभन्दा धेरै ३ अर्ब ३६ करोड रूपैयाँ छ।
हाल १० अर्ब ६९ करोड चुक्ता पुँजी रहेको बैंकले यस आधारमा पनि ३१.४३ प्रतिशत लाभांश दिनसक्ने क्षमता देखिएको छ।
६ वटा वाणिज्य बैंकको यस्तो रकम ऋणात्मक रहेको र अधिकांशको यस्तो क्षमता घटेको समयमा एभरेष्ट बैंकको क्षमता उच्च देखिएको छ।
यही कारण पनि लगानीकर्ताको आकर्षण बढ्न थालेको देखिन्छ। लाभांश क्षमताकै आधारमा बैंक दोस्रो स्थानमा छ।
चुक्ता पुँजीको आधारमा २१ वाणिज्य बैंकमध्ये अन्तिम पाँचौ स्थानमा रहेको यस बैंक पछिल्लो समय चुक्ता पुँजी वृद्धिमा पनि लागेको जस्तो देखिएको छ।
विगत चार वर्षमा अघिल्ला तीन वर्षमा अधिकतम ६ प्रतिशत बोनस सेयर दिएको बैंकले गत आर्थिक वर्ष २०७८/७९ को नाफापछि भने १३ प्रतिशत बोनस सेयर ७.६८ प्रतिशत नगद लाभांश दिएको थियो।
बैंकहरूमा अधिकतम ३४ अर्ब १२ करोड रूपैयाँसम्म चुक्ता पुँजी रहँदा एभरेष्ट बैंकको भने १० अर्ब ६९ करोड रूपैयाँ छ।
केही वर्ष अघिसम्म नगद लाभांशमै बढी जोड दिएको बैंकले गत आर्थिक वर्षबाट भने बोनस लाभांशको हिस्सा बढाएको छ। यही कारण पनि लगानीकर्तामा बैंकप्रति आकर्षण बढेको हुनसक्छ।
अधिकांश बैंकको यो अवधिमा खराब कर्जा बढ्दा यस बैंकको यस्तो कर्जा भने मात्रै ०.७ प्रतिशत छ।
बैंकको प्रतिसेयर आम्दानी ३०.७४ रूपैयाँ, प्रतिसेयर नेटवर्थ दुई सय २५ रूपैयाँ छ। त्यस्तै कम्पनीको मूल्य आम्दानी अनुपात १६.५३ गुणा छ।
प्राविधिक विश्लेषणको औजार मैनबत्ति चित्र अनुसार हाललाई बैंकको सेयर मूल्य बढ्न रोकिने संकेत पनि देखिएको छ।
त्यस्तै, पिभट विश्लेषण्ले समेत आगामी साता पाँच सय ५९ कम्पनीको लागि पहिलो लक्ष्य हुनेछ। मुभिङ एभरेज रेखाले भने बैंकको मूल्य बुलिश प्रवृत्तिमै छ।