राष्ट्र बैंकले डा. रेवतबहादुर कार्कीको संयोजकत्वमा बैंकिङ क्षेत्र सुधार कार्यदल गठन गरेको छ।
केही दिनदेखि यसको तयारी भइरहे पनि शुक्रबार यस्तो कार्यदल गठन भएको राष्ट्र बैंकले सार्वजनिक गरेको छ।
कार्यदलमा पूर्व बैंकर भुवन दाहाल र राष्ट्र बैंककै बैंक तथा वित्तीय संस्था नियमन विभागका कार्यकारी निर्देशक सदस्य रहने भएको छ। हाल राष्ट्र बैंकको बैंक तथा वित्तीय संस्था नियमन विभागका कार्यकारी निर्देशकमा गुरू प्रसाद पौडेल छन्।
एक महिनामा ६ विषयमा सुझाव दिन कार्यदल गठन गरिएको हो।
कार्यदलले बैंकिङ नीति नियमनलाई उदार तर विवेकशील जोखिममा आधारित प्रभावकारी सुपरिवेक्षण ग्राहकमैत्री बैंकिङ सेवाको विकासमा सुझाव दिनेछ।
आर्थिक गतिविधि पूर्ण चलायमान बनाउन बैंकिङ क्षेत्रले खेल्नुपर्ने भूमिका, ग्रामीण क्षेत्रमा कर्जा प्रवाहलाई प्रभावकारी बनाउन चाल्नुपर्ने कदम, बैंकहरूको मर्जर तथा प्राप्तिबाट उब्जिएका समस्या समाधानका विषयमा कार्यदलले सुझाव दिनेछ।
त्यस्तै, नेपाललाई सम्पत्ति शुद्धीकरण सम्बन्धी ग्रे लिस्टबाट हटाउने विषय र पुँजी बजार विकासमा केन्द्रीय बैंकको समन्वयात्मक भूमिका निर्वाह गर्ने विषयमा सुझाव दिने जिम्मेवारी दिइएको छ।
