नेपाल स्टक एक्सचेञ्ज (नेप्से) ले सेयर बजार परिसूचक गणनासम्बन्धी जनचासोलाई सम्बोधन गर्दै यसलाई प्रष्ट्याएको छ।
नेप्सेका अनुसार नियमित कारोबार सत्रमा बिहान ११ बजेदेखि अपरान्ह ३ बजेसम्म हरेक कारोबारको मूल्यलाई सूचीकृत सेयर संख्याले गुणान गरी त्यसलाई समायोजित आधार बजार पुँजीकरणले भाग गरेर सूचकांक गणना गरिन्छ।
यसरी प्राप्त नतिजालाई एक सयले गुणान गरी तत्काल नेप्सेको वेभसाइटमार्फत देखाइन्छ।
तर अपरान्ह तीन बजेपछि भने सूचकांक गणनामा फरक तरिका प्रयोग हुन्छ। सो समयमा नेप्से प्रणालीले कारोबार भएका सेयर संख्याका आधारमा भारित औसत मूल्य निकाल्छ र त्यसलाई अन्तिम मूल्यका रूपमा लिन्छ।
सो मूल्यलाई सूचीकृत सेयर संख्याले गुणान गरी समायोजित आधार बजार पुँजीकरणले भाग गरेर त्यस दिनको अन्तिम नेप्से सूचकांक सार्वजनिक हुन्छ।
नेप्सेले स्पष्ट पारेको छ कि नियमित कारोबार अवधिमा सूचकांक गणनामा सेयर कारोबार संख्याको प्रभाव हुँदैन। तर अपरान्ह तीन बजेपछिको गणनामा भने कारोबार संख्याको प्रत्यक्ष प्रभाव पर्छ।
यो अभ्यासलाई विश्वव्यापी मान्यता प्राप्त असल अभ्यास भन्दै नेप्सेले धितोपत्र बोर्डबाट स्वीकृत कारोबार सञ्चालन विनियमावली (चौथो संशोधन) २०८१ को प्रावधानअनुसार २०८१ चैत ७ गतेदेखि कार्यान्वयनमा ल्याएको उल्लेख गरेको छ।
साथै, सूचकांक गणना पूर्ण रूपमा स्वचालित प्रणालीमार्फत हुने भएकाले यसमा कुनै शंका नगर्न नेप्सेले सर्वसाधारणलाई अनुरोध गरेको छ।
-1755241369.jpg)
-1746009348.jpg)
