करीब एक महिनादेखि नेप्से परिसूचक दुई सय अंकले तलमाथि गरिरहेको छ। यो अवधिमा नेप्सेले २७ सयलाई तल्लो तह र २९ सयलाई माथिल्लो तह मानेर तलमाथि गरिरहेको छ।
यसले नेप्से साइडवेज प्रवृत्ति अर्थात् दुई निश्चित विन्दुबीचमा रहेर तलमाथि गर्ने प्रवृत्तिमा बजार देखिएको संकेत गर्छ।
आइतबार पनि नेप्से परिसूचक दोहोरो अंकले घटेको छ। यसदिन नेप्से परिसूचक ३१.१७ अंकले घटेर २७४९ मा आइपुगेको हो।
कारोबार रकम पनि अघिल्लो कारोबार दिन बिहीबारको तुलनामा घटेको छ।
बिहीबार आठ अर्ब नौ करोड रूपैयाँको कारोबार भएकोमा आइतबार ६ अर्ब ६ करोड रूपैयाँमा सीमित भएको छ।
कारोबारमा आएका सबै समूहगत परिसूचक घटेका छन्। विकास बैंक र जलविद्युत समूहको परिसूचक सबैभन्दा धेरै क्रमशः १.५९ र १.४७ प्रतिशतले घटेका छन्।
यसदिन तीन सय २१ वटा लगानी उपकरणको कारोबार भएकोमा ४८ वटाको मूल्य बढ्यो, दुई सय ६१ वटाको मूल्य घट्यो। बाँकीको स्थिर रह्यो।
नेपाल पुनर्बीमा, हिमालयन रि इन्सुरेन्स, हिमालयन डिष्टिलरीमा लगानीकर्ता अझै आकर्षित देखिएका छन्। यी कम्पनीको २६ देखि ४५ करोड रूपैयाँसम्म सेयर किनबेच भयो।
केही समयअघि सूचीकरण भएको विकास हाइड्रोको सेयर मूल्य घट्न थालेको छ। कम्पनीको सेयर मूल्य ४.७१ प्रतिशतले घटेर पाँच सय ४२ रूपैयाँमा कारोबार भएको छ।
यसदिन उन्नती सहकार्य लघुवित्तको सेयर मूल्य सबैभन्दा धेरै ६.७७ प्रतिशतले बढेर २३९६ रूपैयाँमा कारोबार भइरहेको छ।
ग्लोबल आइएमइको सम्मुनत योजना दुईको इकाइ मूल्य सबैभन्दा धेरै १० प्रतिशतले घटेर नौ रूपैयाँमा सेयर कारोबार भएको छ।
-1746009348.jpg)
