साताको अन्तिम कारोबार दिन अर्थात् बिहीबार नेप्से परिसूचक १०.६६ अंकले घटेको छ।
नेप्से ०.४० प्रतिशतले घटेर २६१५.०३ विन्दुमा पुगेको छ।
बिहीबार नेप्से परिसूचक घटेपनि कारोबार रकम अघिल्लो दिनको तुलनामा बढेको छ।
बुधबार ४ अर्ब पाँच करोड रूपैयाँको सेयर कारोबार भएकोमा यस दिन उक्त रकम बढेर ४ अर्ब ५७ करोड रूपैयाँ पुगेको छ।
यस दिन ३२९ वटा धितोपत्रको एक करोड १२ लाख ९१ हजार ४०१ कित्ता सेयर किनबेच भएको हो।
यसदिन ६३ कम्पनीको सेयरमूल्य बढेको छ भने १९४ वटाको घटेको छ। यस्तै दुई कम्पनी स्थिर छन्।
बिहीबार स्वस्तीक लघुवित्त र एसवाइ प्यानलको सेयर मूल्य सर्वाधिक १० प्रतिशतका दरले बढेका छन्।
उक्त कम्पनीहरूको प्रतिकित्ता मूल्य क्रमशः तीन हजार ९७ रूपैयाँ १० पैसा र ६२२ रूपैयाँ ६० पैसा पुगेको छ।
यस्तै, सिन्धु विकास बैंकको मूल्य ९.५६ प्रतिशतले बढेर प्रतिकित्ता मूल्य ७९८ रूपैयाँ कायम भएको छ।
बाराही हाइड्रोपावरको सेयर मूल्य सर्वाधिक ४.७६ प्रतिशतले घटेर प्रति कित्ता मूल्य ४६५ रूपैयाँमा झरेको छ।
यस्तै, गुहेश्वरी मर्चेन्टको सेयर मूल्य ३.१३ प्रतिशतले घटेर प्रतिकित्ता मूल्य ४६५ रूपैयाँमा सीमित भएको छ।
बिहीबार बाराही हाइड्रोपावरको सर्वाधिक कारोबार भएको छ।
उक्त कम्पनीको प्रतिकित्ता ५३४ रूपैयाँमा २४ करोड ७२ लाख बराबरको सेयर कारोबार भएको हो।
सर्वाधिक सेयर खरिद–बिक्री हुने दोस्रो सूचीमा राधी विद्युत रहेको छ। उक्त कम्पनीको ७४८ रूपैयाँमा १८ करोड ३५ लाख रूपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये तीन समूहको परिसूचक बढेको छ भने बाँकी १० समूहको परिसूचक घटेको छ।
यस दिन वित्त समूहको परिसूचक सर्वाधिक १.५३ प्रतिशतले घटेको छ।
-1746009348.jpg)
