चालु आर्थिक वर्ष २०८२/८३ को पाँच महिनामा नेपालले विदेशबाट पाउने आम्दानी खर्चभन्दा धेरै भएको छ।
यस अवधिमा देशको बाह्य कारोबारबाट ३५८ अर्ब ८३ करोड रूपैयाँ बचत भएको छ। अघिल्लो वर्षको सोही अवधिमा यस्तो बचत १५८ अर्ब ४५ करोड रूपैयाँ मात्रै थियो।
डलरमा गणना गर्दा पनि विदेशी कारोबारको अवस्था सुधारिएको देखिन्छ।
अघिल्लो वर्ष पाँच महिनामा १ अर्ब १८ करोड डलरले बचतमा रहेको बाह्य आम्दानी–खर्चको अवस्था यस वर्ष सोही अवधिमा २ अर्ब ५४ करोड डलरले बचतमा पुगेको छ।
यस अवधिमा विदेशबाट आउने अनुदान तथा पुँजीगत सहयोग ७ अर्ब ६ करोड रूपैयाँ पुगेको छ। अघिल्लो वर्षको सोही अवधिमा यस्तो सहयोग ३ अर्ब ५० करोड रूपैयाँ रहेको थियो।
नेपालमा प्रत्यक्ष रूपमा आएको वैदेशिक लगानी पनि बढेको छ। पाँच महिनामा ७ अर्ब ४७ करोड रूपैयाँ बराबरको प्रत्यक्ष वैदेशिक लगानी भित्रिएको छ। अघिल्लो वर्षको सोही अवधिमा यस्तो लगानी ६ अर्ब ३ करोड रूपैयाँ थियो।
विदेशबाट आउने र विदेश जाने पैसाको हिसाबमा नेपालले ४२१ अर्ब ८९ करोड रूपैयाँ बचत छ।
अघिल्लो वर्षको सोही अवधिमा यस्तो बचत २२५ अर्ब ३४ करोड रूपैयाँ मात्रै थियो। डलरमा गणना गर्दा यो बचत २ अर्ब ९८ करोड पुगेको छ, जुन अघिल्लो वर्ष १ अर्ब ६८ करोड थियो।
रेमिटेन्सको उच्च वृद्धिदर, आयातको तुलनामा निर्यात र सेवा आम्दानीमा देखिएको सन्तुलन तथा वैदेशिक लगानी र सहयोग बढ्नुका कारण नेपालको बाह्य आर्थिक अवस्था थप सबल बनेको छ।
-1746009348.jpg)
