लघुवित्त कम्पनीहरूले दैवी प्रकोप तथा दुर्घटनामा परेका ग्राहकको परिवारलाई सहयोग गर्न सक्ने भएका छन्।
कम्पनीहरूले ग्राहक संरक्षण कोषको रकमबाट यस्ता ग्राहकका परिवारलाई सहयोग गर्न सक्ने भएका हुन्।
नेपाल राष्ट्र बैंकले लघुवित्त कम्पनीहरूलाई जारी गरेको एकिकृत निर्देशनमा संशोधन गर्दै यस्तो व्यवस्था गरेको हो।
ऋणीहरुको हितमा खर्च गर्ने गरी अलग्गै ग्राहक संरक्षण कोषका वार्षिक नाफाबाट रकम जम्मा गर्न पर्ने व्यवस्था छ।
कम्पनीहरूले २०८२ असारसम्म यस्तो कोषमा नाफाको १.५ प्रतिशत रकम राख्नुपर्ने व्यवस्था छ।
२०८३ असारमा भने यस्तो कोषमा नाफा रकमको २ प्रतिशत र २०८४ असारमा ३ प्रतिशत राख्नु पर्ने व्यवस्था गरिएको छ।
यस्तो कोषबाट सामूहिक हित हुने कार्य गर्न, समस्यामा परेका ऋणीको व्यवसायको सुरक्षण एवं पुनर्स्थापना गर्न, ग्राहकहरूको शिक्षा र क्षमता विकास एवं ग्राहकहरूका सन्तानको विद्यालय स्तरको शिक्षा, स्वास्थ्य तथा पोषण सम्बन्धी कार्यक्रममा उपयोग हुने गरी मात्र खर्च गर्न पाइन्थ्यो।
अब दैवी प्रकोप तथा दुर्घटनामा परेका ग्राहकको परिवारलाई पनि सहयोग गर्न सकिने भएको हो।
-1746009348.jpg)
