नेपाल राष्ट्र बैंकका गभर्नर प्राडा विश्वनाथ पौडेल र भारतीय रिजर्व बैंक (आरबिआई) का गभर्नर सञ्जय मलहोत्राबीच गत माघ ५ गते भेटवार्ता भएको छ।
मुम्बईस्थित आरबिआईको मुख्यालयमा सम्पन्न भेटमा नेपाल र भारतबीच हुने अन्तर्देशीय विद्युतीय भुक्तानी कारोबार तथा दुईपक्षीय हितका विविध विषयमा छलफल भएको हो ।
भेटवार्तामा विशेषगरी नेपाली नागरिकले भारत भ्रमणका क्रममा क्युआर कोडमार्फत सहज रूपमा भुक्तानी गर्न सक्ने व्यवस्था मिलाउने विषयमा छलफल केन्द्रित रहेको नेपाल राष्ट्र बैंकले जनाएको छ।
यसका साथै मौद्रिक नीति, तरलता व्यवस्थापन, विदेशी विनिमय व्यवस्थापन, आर्टिफिसियल इन्टिलिजेन्समा आधारित बैंक सुपरिवेक्षण तथा सूचना प्रविधि क्षेत्रमा आरबिआईले अवलम्बन गरेका असल नीतिगत अभ्यासबारे पनि विचार–विमर्श भएको थियो।
त्यसैगरी, वित्तीय क्षेत्रका उदीयमान तथा समसामयिक मुद्दा र नेपाल–भारतबीचको सहकार्य तथा अनुभव आदानप्रदानलाई थप सुदृढ बनाउने विषयमा समेत छलफल भएको बताइएको छ।
भेटमा नेपाल राष्ट्र बैंकका विदेशी विनिमय व्यवस्थापन विभागका कार्यकारी निर्देशक किरण पण्डित, भुक्तानी प्रणाली विभागका कार्यकारी निर्देशक डा.सत्येन्द्र तिमिल्सिना तथा बैंक सुपरिवेक्षण विभागका कार्यकारी निर्देशक दीर्घबहादुर रावलले आ–आफ्नो विभागसँग सम्बन्धित विषयमा आरबिआईसँग सहकार्य गर्न सकिने धारणा राखेका थिए।
यसैबीच, भारत भ्रमणकै क्रममा गभर्नर पौडेलले माघ ६ गते गुजरातको अहमदाबादस्थित इन्टरनेसनल फाइनान्सियल सर्भिस सेन्टर्स अथोरिटीका उच्च अधिकारीहरूसँग पनि भेटवार्ता गरेका थिए।
भेटमा गुजरात इन्टरनेसनल फाइनान्स टेक–सिटीको अवधारणा, हालको अवस्था, लगानी प्रवर्द्धनका लागि अवलम्बन गरिएका नीति तथा नेपाल राष्ट्र बैंकसँग सहकार्य गर्न सकिने सम्भावनाबारे छलफल भएको थियो।
-1746009348.jpg)
