नेपाल इन्भेष्टमेन्ट मेगा बैंकले स्मार्ट टेलिकम प्रालिको सम्पत्ति लिलाम बिक्रीसँग सम्बन्धित विषयमा भइरहेको अनुसन्धानमा आवश्यक सहयोग गरिरहेको जनाएको छ।
त्यस्तै आगामी दिनमा पनि निरन्तर सहयोग गर्ने प्रतिबद्धता व्यक्त गरेको छ।
बैंकले मंगलबार प्रेस विज्ञप्ति जारी गर्दै नेपाल प्रहरीको केन्द्रीय अनुसन्धान ब्युरो (सिआइबी) ले बैंकका प्रमुख कार्यकारी अधिकृत (सिइओ) ज्योति प्रकाश पाण्डेसहित केही व्यक्तिलाई अनुसन्धानका लागि नियन्त्रणमा लिएको सन्दर्भमा विभिन्न सञ्चार माध्यममा आएका समाचारप्रति ध्यानाकर्षण भएको पनि जनाएको छ।
बैंक तथा वित्तीय संस्था सम्बन्धी ऐन, २०७३ तथा सुरक्षित कारोबार ऐन, २०६३ ले दिएको अधिकार अनुसार कर्जा असुली प्रक्रियाअन्तर्गत स्मार्ट टेलिकमको सम्पत्ति लिलाम बिक्री गरिएको बैंकको दाबी छ। बैंकले निक्षेपकर्ताको रकम सुरक्षित गर्न कानुनी दायित्व अनुसार प्रक्रिया अघि बढाइएको स्पष्ट पारेको छ।
बैंकका अनुसार स्मार्ट टेलिकमसँग सम्बन्धित विभिन्न उपकरण तथा सामग्री लिलामीका लागि २०८१ असोज ३ गते सूचना प्रकाशित गरिएको थियो।
सोही प्रक्रियाबाट प्राप्त भएको करिब ४ अर्ब ६० करोड रूपैयाँमध्ये ४ अर्ब २२ करोड रूपैयाँ सहवित्तीयकरण कर्जा भुक्तानीमा प्रयोग गरिएको उल्लेख छ।
बाँकी रहेको करिब ३८ करोड रुपैयाँ भने 'अर्नेस्ट मनि अक्सन एकाउन्ट' मा राखिएको बैंकले जनाएको छ।
उक्त रकम दूरसञ्चार सेवासँग सम्बन्धित उपकरण जडान भएका घरजग्गा धनीहरूको बाँकी घरभाडा तथा विद्युत महसुल भुक्तानीका लागि छुट्याइएको बैंकको भनाइ छ।
सम्बन्धित निकायबाट प्रमाणसहित माग आएपछि नियमानुसार भुक्तानी गरिने पनि बैंकले जनाएको छ।
अनुसन्धान प्रयोजनका लागि माग गरिएका सम्पूर्ण कागजात, विवरण तथा आवश्यक सहयोग उपलब्ध गराउँदै आएको र आगामी दिनमा पनि निरन्तर सहयोग गर्ने प्रतिबद्धता बैंकले व्यक्त गरेको छ।
साथै, अनुसन्धान प्रक्रियाले बैंकको दैनिक कार्य सञ्चालन, वित्तीय सुशासन, निक्षेपकर्ताको हित तथा ग्राहक सेवामा कुनै असर नपर्ने दाबी गर्दै बैंकले निक्षेपकर्ता, ग्राहक, सेयरधनी तथा नेपाल राष्ट्र बैंकप्रति आभार व्यक्त गरेको छ।
